ANGOLO CULTURALE

 

 

 

SANTA LUSIA

I l’à fati su de note, co le asse e col martel,

co le tòle mèse rote piturade da cortel,

co ‘na tenda trata sora co i lumeti trati là..

l’è così che salta fora i bancheti de la Brà!

Là ghe paste,là ghe fiori, gh’è i zugatoli da un franco

(i zugatoli da siori) ma ghe n’è che costa manco;

ghi n’è fin che costa un besso, e ghi n’è che de val tri..

“con parmesso, con parmesso che voi vedarli anca mi”

Le puete bele bianche,le se buta fora in strada;

un caval da do palanche l’è drio a trame una peada…

sto tranvai co i so vagoni par che el fassa: fu fu fu !

“bei maroni, bei maroni,de comandelo, anca lu ?”

Giovanin , l’è meso mato par sta bela carossina;

“Mandolato! Mandolato tuto mandole e farina…”

Quanta gente! Che boresso, drio a ‘na tromba che fa piiii…

“con parmesso ,con parmesso, che voi vedarla anca mi,!

-         Me morosa picinina de girar no l’è mai straca;

se la cata una vetrina, l’è ‘na pègola che taca;

la roversa fin i oci, la me sburta e, signor sì,

se badase a i so zenoci, cosa mai saria de mi!

-         Me morosa piassè granda, la rasona e la me scolta,

mai da mi no la se sbanda, l’è un piser condurla in volta….

La me dise in te una recia: “No sta spèndar, l’è pecà!”

Me morosa piassè vecia, l’è la prima de la Bra!

                                                                                 (Berto Barbarani )